護身符
Daddy | 2011 年 04 月 16 日我的女兒是被我寵壞的。
快要上小學了,還經常要Daddy抱抱……
我一雙強勁的麒麟臂和結實的胸膛就是這六年來鍛鍊的成果。
我常跟自己說:抱得幾多年吖……
繪畫班下課的時候……
Mammy : 送支筆俾你吖!
那是捐血後,紅十字會贈送的紀念品。
Brittany : 咦?
Mammy : 你知唔知Daddy頭先去咗邊呢?
Brittany看著那支筆,很快便找出端倪。
Brittany : 嗯…… 攞啲血出嚟!
Mammy : 哈哈…叻女喎!不過呢啲唔係叫攞啲血出嚟,叫捐血。
Brittany : 嗯… 點解要捐血嘅?
Daddy : 捐血救人囉!有啲人受咗傷,流咗好多血,我咪捐啲血救佢哋囉。
我伸出前臂,讓Brittany看看傷口上那塊圓形的小膠布。
Daddy : … 隻手仲有啲痛添。
當然是假的。
小鬼沒有說話,卻溫柔地輕按著那塊小膠布,眼神還好像帶幾分敬佩……
Mammy : 好嘞,我哋去食啲嘢嘞。
小鬼張開雙手仰頭跟我說:
Brittany : Daddy,我有啲攰呀。
我的女兒又要我抱抱了。
我故意皺起眉頭,看著手臂上的膠布……
Daddy : … 嚟啦!
Brittany如夢初醒的立即縮起雙手……
Brittany : 都係唔使嘞。
Daddy : 點解呀?
小鬼拖著我的手笑而不答。
我和Mammy互換了一個眼神,感覺無比窩心。^^
這塊膠布… 最少要貼上三數天啊!呵呵…
BriBri大個女了…很懂性呢 ^^
Mammy : 我地都估唔到呢….^^
我都係,成日同自己講墨屎現在已經3歲7個月,有36磅….都唔知可以抱多幾多年….(男仔可能更多唔俾我抱),所以我都有雙麒麟臂!(可惜我係媽媽!)
Mammy : 係啦, 到時想抱, 佢可能都會話唔使….@_@
吓! BriBri咁大個, 仲要嚷著要抱呀, 真係比Daddy寵壞了, 不過好彩Brittany好懂性, 真係抵鍚!
Mammy : 好攰好眼瞓個時….唔關大個事 lu ^^
等我平時出街都要帶定張膠布先得!
Daddy : 咁快用呢招?你想唔想好似我咁結實先?XDXDXD
很喜歡看這blog!吸引我的不單是bri bri可愛的面孔,還有daddy的幽默!:)
Daddy : 嘿!還以為是我的攝影技巧呢!XD
真係懂事….好羨慕.
Mammy : 唔使羨慕 wor …. 你仔咪又係成日氹你…. ^^
Bri 腳上面都好似有塊膠布WOR…..hehe
Daddy : 咁都俾你睇到!佢朝早sir滑梯整到架。^^
Bri Bri 是乜野血型ga? 我估B型~~
Mammy : 咩原因你會估 B 型呢…. ?
好感動 睇了好幾年了 睇到流眼淚 so sweet
Daddy:嗯⋯我有時自己翻睇都好感動啊~:P